參與派古曼更也大法會 - 後篇

carloschoi

派古曼更也大法會 - 後篇





先向各位師兄致歉，因為小弟最近太忙（最近戴上派古曼更也，感覺就似開初帶派更也時既感覺一樣），完全無時間打埋下篇，希望大家繼續支持。

承上篇，大法會前一晚各位理事，工作人員一齊食飯，住宿的地方，就係Wat Boonyarit 既附近，地方就好似係長州既渡假屋咁，好簡陋，周圍都係蜈蚣(驚驚)，不過空氣真係好清新。接過工作人員既制服，好好休息一覺，準備聽日既工作。


食完早餐就開始大法會

一大早，食完早餐大家就浩浩蕩蕩去Wat Boonyarit ，今次既大法會有5位高僧，包括龍婆壯，龍婆艮能，龍婆劇，阿贊DeeLak，龍婆黏，心水清的大家一定會覺得奇怪，點解大法會既相片唔見龍婆黏，當日早上收到龍婆黏近身弟子的電話，因為龍婆黏身體不適入院，無法出席大法會。當大家以為由原定5位高僧變得4位的時候，突然收到電話，係龍婆PaWaNaSopon打黎話要出席，原來係有次有位理事曾經探望龍婆PaWaNaSopon 時有提及將會在2月25日有派古曼更也大法會，龍婆PaWaNaSopon突然的填補亦令大家覺得好神奇，令大法會的高僧人數維持5位，一切都好似有暗中幫助咁。


龍婆壯


龍婆PaWaNaSopon


阿贊DeeLak


龍婆艮能


龍婆劇


龍婆艮能為法會燃點蠟燭開始

當日大法會分開上下午，由於2月25日係各大法會既好日子，龍婆艮能答應上午出席派古曼近也法會，下午要參與其他法會，所以上午就由龍婆艮能主持開始儀式，先同龍婆壯開始一次法會加持，龍婆艮能在法會開始前，幫各位善眾逐一祝福，亦有送出師父的聖物靈猴【令】的小立尊。龍婆艮能就好似明星咁，當師父踏入主殿時，大家都好似歌迷影迷咁影相，頂禮師父。就連師父口中的檳榔都唔會放過，有善眾請求師父，想得到師父吐中的檳榔，當然師父亦樂意送比呢位善眾。


龍婆艮能為我加持


龍婆艮能口中的檳榔




龍婆壯逐一為工作人員加持

中午大家稍作休息，在廟中吃個簡單午餐，龍婆壯和大家傾計，中間亦為大家逐一祝福加持，師父人真係好好，係咁忙咁辛苦既法會都為大家加持，師父亦送左攢左經文既錢母比我地。


龍婆劇駕臨

到下午的另一場大法會，即有龍婆劇主持，參與的有龍婆壯，阿贊deelak，龍婆PaWaNaSopon 。龍婆劇有火雲聖僧之稱，在香港雖然唔多人會請師父的牌，不過龍婆劇既名氣係泰國其實好勁。好多法會都會邀請師父幫手加持，師父的駕臨，連幾位龍婆，阿贊都要頂禮師父。龍婆劇亦為龍婆壯做一次祝福加持的法事，為龍婆壯在頭上點上人緣膏，師父雖然已經95歲，但精神十足，為龍婆壯吹一口氣，我數過有20秒，都真係中氣十足，難怪師父有一個故事，就係曾經在美國出席法會，有一位外國善眾挑戰師父既手力想拗手瓜，師父坐低唸經為自己加持，然後就同呢位外國善眾比試，結果當然師父勝出。如果大家有聽過或睇過，龍婆劇有時會在法會上顯示神通，單手拎起超過5L水既水砵，題外話，今次我都試過拎呢個裝滿水既水砵，我用雙手拎都覺得好重，所以師父功力唔係講笑。


龍婆劇在龍婆壯頭上用人緣膏加持

法會期間我覺得好特別的事，就係當各位師父們頌經期間，有好多雀仔飛入黎主殿，我已經係Wat Boonyarit 幾日，雖然周圍都好多雀仔，但都無飛過入去裡面。動物好有靈性，我覺得雀仔都想聽下經文，為自己洗滌心靈，有見及此，除左影下相，我都乖乖雙手合十，聽下經文，雖然唔識唔明，但的確，內心又真係平靜得多。




雖然今次龍婆劇無單手舉水砵既神通，但亦有佢獨門既加持方法，手持蠟燭一邊唸經，蠟燭經由自己隻手滴落水砵，有時又用手整熄d蠟，再繼續唸經，最後加持完畢，善眾又等待龍婆手中的蠟燭作紀念。我都有幸攞左少量蠟燭，會鑲殼當冠蘭咁戴係身上。法會由龍婆劇主持下結束，最後龍婆劇為各善眾用聖水祝福，亦送上自身牌給各位，今次旅程真係收獲豐富。法會完滿結束後，龍婆壯交代理事們向善眾贈送派古曼近也符珠。











回到香港的第一天，收到泰國朋友的電話，原來龍婆壯交代要送我同朋友一塊派古曼近也坤平的試模，要多謝我地既落力幫忙。試模做了39塊，但有1塊已經爛左，所以正確數量為38塊，呢塊係我收牌以來覺得最有價值的佛牌。



派古曼近也的試模




龍婆艮能『令』的小立尊及龍婆劇自身牌

岩岩係3月31日，又有報紙介紹呢一次的大法會。而且4月仲會有派古曼近也的圖鑑推出，係呢度比大家先睹為快。












以下係介紹文，轉載自朋友的資料，介紹2塊比較多人追捧的派古曼近也，當中為大家講下呢2塊牌的資料、故事。如果覺得hard sell就自行skip吧。5符管特別版（108塊），泰文叫藍囉（拉長尾音）（有師兄叫南叻)，自己覺得用國語讀音【樂】字比較適合，但廣東話我又諗唔到咩字岩用。泰文藍囉的意思係美好的時機，係想善眾做任何事都擁有美好的時機，做每樣事能完滿。呢塊5符管特別版喺開始預定，只用左幾個鐘已經售罄，小弟我都錯失時機，及後再入手已經翻幾倍，呢面坤平背後會見到點上人緣膏，而呢樽人緣膏我係親眼見到龍婆壯係自己房拎出黎，所以人緣膏每日都有龍婆壯的加持，而師父親自為藍囉再點上加持，令南囉更加完滿。


派古曼近也『南囉』




背後有龍婆壯再加持的人緣膏另外仲有5符管理事版，又叫錯模版（199塊），理事版其實係做派古曼近也坤平既最後一批，已經到最後但樽派古曼粉更也粉仲有剩，所以就加哂入去。所以理事版係全批坤平中最多粉既。原本想做出黎既理事版顏色係想有龍婆添派古曼坤平的黃肉版（黃金花），了解龍婆添佛牌的師兄應該都知道黃肉版係咁多版本中最珍貴的。但經過各種材料混合之後，出黎既顏色，竟然黃中帶綠，直情就似足龍婆添派古曼坤平-扑叻一樣，大家都好驚喜，亦都一致認為今次做派古曼近也的方法同材料都接近龍婆添的做法，所以理事版亦用作圖鑑封面，可想而知大家都覺得比較特別。





背後右上角印上『特別』的泰文


最後一樣野想考下大家，就係大家都知道做佛牌都有好多唔同材料啦，但你地又知唔知點樣先可以令呢d材料黏合而做出一塊佛牌呢？答案係下面。。。。。。。。。。。
























答案係蕉係短身既蕉，應該係皇帝蕉咁上下既品種。原來有好多佛牌係會同膠水去混入材料而令佛牌黏合，但如果想以正宗的方法係用蕉，而做牌師父係用匙羹係蕉的旁邊括出蕉肉，去到個心（即黑色有籽的部分）就會停，唔會再用，為免溝左唔同顏色落去，所以做一塊牌都唔簡單架，你地又試下聞下有無蕉味丫。以上資料，歡迎大家(包括各牌商)轉載，最重要係各位講出正確的資料，能夠幫到廟亦係大家既福報。今次出席大法會我大開眼界，都要多謝朋友同泰國的理事們熱情招待，希望再有機會去唔同的大法會分享比大家。

Merlion_L

終於等到啦！

                               
登錄/註冊後可看大圖

hwb1987

謝謝分享

varaisb

感謝分享！

cck95

多謝分享

Ezreal

師兄有福

MartinYuen

多謝分享，件 t-shirt 個色都唔易著 . .

Chilam1031

Sang182

Cccccc.                                    

carloschoi

MartinYuen 發表於 1-4-2018 21:45

                               
登錄/註冊後可看大圖

多謝分享，件 t-shirt 個色都唔易著 . .

我未有勇氣係香港著。。。

                               
登錄/註冊後可看大圖

                               
登錄/註冊後可看大圖